Fasnacht 2024
Mit em Kopf dur d Wand, das bringt en us dr Rueh
Kunnt em Xhaka aine blööd, so haut är au mol zue
Är heigs doch esoo gleert, verzellt är uns schweissnass
Är sigg halt für e Wyyli bim Läderach in d Klass
“S Züri-Fäscht” wird das Joor nimmi duuregfiert
Neu het me de Aaloss dr Zyt entsprächend optimiert
Schiints bruucht me das Gäld, dä Platz und d Ländereie
Für die neggschte grosse Eriträer-Schleegereie
“Dört isch linggs, nei doo ischs doch – jetzt kummi nimmi druss!”
“Mir mien fiire, das isch hindere – was schwätzisch du für Stuss?”
Orientierigsloos, kai Plan was lauft, do mergge mir scho glyy
Ka das nur e Spieler vom FC Basel syy
Maint d Frau Saarasiin zu ihrer Fründin: “Gopfridstutz!
Syt unsere Ferie lauft mym Schatz im Bett dr Schnyydelwutz
Wild und stiirmisch zuggt är umme- wie in ere Romanze
Und alles nur dangg däne franzöösische Bettwanze!”
Dr Jans folgt uf e Berset e Basler an dr Macht
Alli hän sich gfreut nur dr Jositsch het nit glacht
Im Unterschiid zum Berset het halt unsere Jans
Nit nur längeri Hoor sondern au … dr besser Dialäggt
Dr Herr Meeriaan mecht vom KI eppis über dr FC Baasel wüsse:
“Saag emool, het dä David Dääge au e Gwüsse?
Kasch du mir ächt brichte was dä eso studiert?”
Und denn isch das Gräät doch aifach explodiert!
D Waale in Amerika sin wiider lanciert
Wirds dr Biden, dr Trump oder e andere, wo denn das Land regiert?
Mir hän uusegfunde – das isch e diggi Kischte!
Jetzt stoot deert schiinbar neu no dr Jositsch uf dr Lischte
An dr Fifasitzig wird heftig diskutiert
Wo findet die neggscht WM statt? Wär het am Beschte gschmiert?
Wo duet me für die junge Burschte ächt am Beschte soorge?
Schiints het sich dr Vatikan liebend gärn bewoorbe