Fasnacht 2025
Sii dä Donald Trump isch nit grad so e Scheene
Ains muess me em loo syni Hoor ka är guet feene
Jetz het sich doch dä Möchtegärn-Toupet-Figaro
Doch wirgglig no im hooche Alter e Oorelöchli schiesse loo
Sii dä Donald Trump isch immer no kai Scheene
Am liebschte duet är Fraue, eb si wänn oder nit, “verweene“
S Melania duet är im Bett sit langem nimm begligge
Will jeedi Nacht dä Elon Musk im Bettgrääbli duet ligge
Hoggsch uf em Hyysli mit Verstopfig- s kunnt heggschtens warmi Luft
De murggsisch, grampfsch di ab- me schmeggt e stargge Duft
No jodlisch in de heggschte Deen, wie e kaschtrierti Katz
Und gwinnsch derbyy am Songcontest esoo dr eerschti Blatz
Dr Mustafa Atici vom Erzieigsdepartemänt
Goot go Schuele bsueche und froogt mit sym Aggzänt:
«Was würd eich gligglig mache – wo händ iir no Bedaarf?»
Do sait e Binggis zuenem: «Y nimm e Döner ooni Schaarf!»
Für d Stadtwaal vom ESC hän villi welle kandidiere
S wird ermittlet wär dä Aalooss guet könnt duurefiere
Züri isch denn zimlig schnäll au dusse us däm Renne
Die schaffes jo nit emol elei e Böög z verbrenne!
Dr FC Basel duet sich ändligg duresetze
Au d Spieler wänn sich nüm freiwillig go verletze
Ganz haimlig dräumt me scho drvo mir draues kuum uszspräche
Als könnti me dä Fluech langsam aafoo bräche
Im Mai e rotblaus Fescht d Freud wär gränzeloos:
Dr Schmid de gitt de Gegner dr letschti Gnadestoos
Freudefüür im Joggeli und dr Celestini
Mit dä Spiler im Whirlpool numme im Bikini
Dass dr Shaqiri uf em Barfi ab em Balkon luege kaa
Stelle mir em aifach e Böggli untedraa
Öb dä Draum sich au erfüllt, wisse numme d Gaischter
Was mir aber wisse, YB wird nit Maischter
Dr Ralf Schuemacher isch nümm heterosexuell
So wäggslet är syni Carosserie ab sofort offiziell
Friener het är s nit gärn ghaa, jetz freuts en uf e Aart
Wenn em ab und zue mol eine hinte iine faart
Sii die Viola Amhärd het schiints Säuli schampaar gäärn
Doch das sigg iire jetz e z grosse Saustall z Bäärn
Wäg so Lapalie gitt die uff- verdrait denn die nit mee?
Die het no nie dr Eymann iire Schugger-Saustall gsee
D Frau Diarrhée het letschti e Brobleemli ghaa
Dr Doggter luegt denn ire griene Stuelgang gnauer aa
Är diagnoschtiziert und maint: “Lön siis numme laufe,
Das könne sii verpagge und as Dubai Schoggi verkaufe.